28.03.2008

Virðum hámarkshraðann

Sett hefur verið upp skilti á ökuleið við kerskála 1 sem nemur hraða ökutækja og aðvarar ökumenn ef þeir aka hraðar en 30km/klst, sem er hámarkshraði innan athafnasvæðisins. Nokkuð hefur borið á því að fólk hafi ekki áttað sig á þeim hámarkshraða sem er innan svæðisins og var því ákveðið að setja upp skiltið. Skiltið sem nú stendur er fengið að láni en tekin hefur verið ákvörðun um að kaupa slíkt skilti til að hafa innan svæðis allt árið um kring. Hafa þessar merkingar gefið góðan árangur í sveitarfélögum í kring þar sem umferð gangandi vegfarenda er innan um akandi umferð. Í næstu viku munu vegmerkingar með hámarkshraða verða settar í götur og við innkeyrsludyr inn í verksmiðjuhús svæðisins þannig að allir ættu því að vera meðvitaðir um 30km hámarkshraða utanhúss og 10 km/klst innanhúss.

Með ráðstöfun sem þessari vill Alcan á Íslandi halda áfram því mikla starfi og frumkvæði sem fyrirtækið hefur haft í heilsu-, öryggis- og umhverfismálum undanfarin ár. Öryggisvitund starfsmanna er til fyrirmyndar og er allt kapp lagt á að gera gestum og öðrum sem eiga erindi inn á svæðið fulla grein fyrir þeim öryggisreglum sem eru í gildi, t.a.m. hámarkshraðanum 30km/klst utandyra og 10km/klst innandyra.

Samskiptasvið.

« til baka