Alcan á Íslandi

03.06.2009

Viðurkenning fyrir góðan árangur í öryggismálum

Alcan á Íslandi hf. - ISAL hlaut í dag viðurkenningu frá Vátryggingafélagi Íslands hf. fyrir góðan árangur í öryggismálum. Guðmundur Örn Gunnarsson, forstjóri VÍS, afhenti Rannveigu Rist forstjóra Alcan á Íslandi viðurkenninguna í Straumsvík í dag.

“ISAL hefur náð framúrskarandi árangri í öryggismálum á undanförnum árum og það er okkur bæði ljúft og skylt að sýna með áþreifanlegum hætti að eftir þessum árangri er tekið,“ segir Guðmundur Örn Gunnarsson forstjóri VÍS.

“Við erum að sjálfsögðu stolt af góðum árangri og afar þakklát fyrir þessa viðurkenningu, en hún er okkur þó fyrst og fremst hvatning til að sofna ekki á verðinum og halda áfram á sömu braut,” segir Rannveig Rist forstjóri ISAL.

Sem kunnugt er hafa rúmlega þrjár milljónir vinnustunda verið unnar á athafnasvæði álversins í Straumsvík án þess að orðið hafi alvarlegt vinnutengt slys og er sá árangur með því allra besta sem þekkist í álverum í Evrópu.