10.02.2011

Efst á lista framúrskarandi fyrirtækja

Alcan á Íslandi hf. var í dag veitt viðurkenning fyrir að vera efst á lista Creditinfo yfir framúrskarandi fyrirtæki 2011. Árni Páll Árnason, efnahags- og viðskiptaráðherra, afhenti Rannveigu Rist viðurkenninguna í dag.

Efstu fimm sæti listans skipuðu, auk Alcan, fyrirtækin Össur, CCP, Stálskip og Grandi.

Matið er byggt á ítarlegri greiningu Creditinfo á styrk og stöðugleika íslenskra fyrirtækja miðað við ýmsar lykiltölur og breytur.

Af rúmlega 32.000 fyrirtækjum sem skráð eru í Hlutafélagaskrá uppfylla 177 fyrirtæki þau skilyrði sem Creditinfo setur fyrir því að fyrirtæki teljist framúrskarandi.

Eftirfarandi er lagt til grundvallar matinu:

  • Að hafa skilað ársreikningum til RSK fyrir rekstrarárin 2007 til 2009
  • Að vera með jákvætt áhættumat Creditinfo, CIP flokkar 1-3 (minni en 1% líkur á alvarlegum vanskilum) í janúar 2011
  • Að hafa ekki verið í vanskilum síðastliðin þrjú ár, 2007-2009
  • Að hafa sýnt rekstrarhagnað (EBITDA) þrjú ár í röð, 2007-2009
  • Að ársniðurstaða hafi verið jákvæð þrjú ár í röð
  • Að eignir hafi verið minnst 80 milljónir kr. öll þrjú rekstrarárin
  • Að eigið fé hafi verið 20% eða meira árin 2007-2009

Rannveig Rist þakkaði Creditinfo fyrir þessa þýðingarmiklu viðurkenningu og óskaði öðrum fyrirtækjum á listanum til hamingju með sinn árangur.

Rannveig benti á að árið 2010 hefði verið gott í rekstri álversins í Straumsvík; ekki aðeins hefðu met verið slegin hvað varðar framleiðslu, öryggismál og marga umhverfismælikvarða, heldur hefði raforkusamningur einnig verið endurnýjaður og ákvörðun tekin um 57 milljarða fjárfestingu vegna endurbóta á álverinu sem kalla mun á hundruð ársverka.


Rannveig Rist tekur við viðurkenningu Creditinfo úr hendi Árna Páls Árnasonar efnahags- og viðskiptaráðherra. Til vinstri er Reynir Grétarsson stjórnarformaður Creditinfo.


Fulltrúar fjögurra af fimm efstu fyrirtækjunum á lista Creditinfo yfir framúrskarandi fyrirtæki (Alcan, Össurar, CCP og Stálskipa), ásamt efnahags- og viðskiptaráðherra og stjórnarformanni Creditinfo.


« til baka