Alcan á Íslandi

13.02.2012

Gísli Örn Gíslason skyndihjálparmaður ársins

Gísli Örn Gíslason, rafvirki á aðalverkstæði Alcan á Íslandi, var um helgina útnefndur "skyndihjálparmaður ársins" af Rauða krossinum fyrir að hafa sýnt hárrétt viðbrögð þegar dóttir hans fór í hjartastopp á heimili þeirra fyrir rúmu ári. Hann tók við viðurkenningu Rauða krossins í Smáralind á laugardaginn var, á hátíðardagskrá Neyðarlínunnar og samstarfsaðila um 112-daginn.

Gísli bjargaði lífi dóttur sinnar, Sigurbjargar Jóhönnu Gísladóttur, með hjartahnoði eftir að hún fór í hjartastopp á heimili þeirra þann 29. janúar 2011.

Eins og fram kemur í frétt Rauða krossins hélt Gísli fyrst að dóttir sín væri að grínast þegar höfuð hennar seig niður, en áttaði sig fljótt á að ekki var allt með felldu og að hjarta hennar hefði stöðvast. Hann kallaði á eiginkonu sína að hringja í sjúkrabíl, tók dóttur sína niður á gólf og hóf strax endurlífgun.

Gísli segir að skyndihjálparnámskeið sem hann hefur farið á reglulega hér í Straumsvík hafi komið sér vel á þessari ögurstundu.

Sjúkraflutningamenn og lögreglumenn komu á staðinn 7-8 mínútum eftir hringt var í 112. Þeir gáfu Sigurbjörgu stuð sem kom hjarta hennar aftur af stað.

Þetta er í ellefta sinn sem Rauði krossinn velur Skyndihjálparmann ársins. Dómnefndina skipa fulltrúar frá Rauða krossi Íslands, Slysavarnarfélaginu Landsbjörgu, Neyðarlínunni, Landsspítala háskólasjúkrahúsi, lögreglunni, og Landssambandi slökkviliðs- og sjúkraflutningamanna.

Tilgangur tilnefningarinnar er ekki síst að hvetja aðra til að læra skyndihjálp og vera þar af leiðandi hæfari til að veita aðstoð á vettvangi slysa og áfalla.

Full ástæða er til að óska Gísla innilega til hamingju með tilnefninguna, en eins og hann bendir sjálfur á eru stærstu verðlaunin að sjálfsögðu þau að hafa bjargað lífi dóttur sinnar.

Tilnefningin er öllum starfsmönnum álversins hvatning til að viðhalda og auka við þekkingu sína á skyndihjálp.

Starfsfólki í Straumsvík er árlega boðið upp á hálfsdags skyndihjálparnámskeið hjá sérfræðingi frá Rauða krossinum. Þátttaka í þessum námskeiðum hefur verið mjög góð og hafa iðulega um 100-150 starfsmenn sótt þau í hvert sinn.

Gísli Örn ásamt dóttur sinni Sigurbjörgu Jóhönnu, eiginkonu og syni. Með þeim á myndinni eru Kristján Sturluson, framkvæmdastjóri Rauða kross Íslands, Ingibjörg Lilja Diðriksdóttir formaður Kópavogsdeildar og Anna Stefánsdóttir formaður Rauða kross Íslands.