19.03.2012

Búnaður fyrir nýjar þurrhreinsistöðvar kom til landsins um helgina

Föstudaginn 16. mars kom til hafnar í Hafnarfjarðarhöfn skip frá Dalian Bihai í Kína með búnað ætlaðan endurnýjun þurrhreinsistöðvanna milli kerskála 1 og 2.

Skipið er það fyrsta í röðinni af tveimur sem flytja þurrhreinsistöðva búnaðinn til Straumsvíkur en seinna skipið er væntanlegt í apríl. Áður hafði komið hluti búnaðsins í gámasendingu. Búnaðurinn er mjög fyrirferðarmikill og mikil kúnst að ferma og afferma skipið án þess að hann skaðist. Unnið hefur verið á 12 tíma vöktum síðan á laugardaginn við að hífa búnaðinn frá borði og hefur hann verið fluttur á 8 vörubílum á geymslusvæðið aftan við aðveitustöðina í Straumsvík.

Endurbætur á þurrhreinsistöðvunum er nauðsynlegur hluti af IPU verkefninu til að mæta framleiðsluaukingingu í kjölfar verkefnisins og uppfylla kröfur Umhverfisstofnunar til framtíðar. Afsog frá kerum verður mun meira eftir breytingarnar, en hreinsivirkni kerfisins í heild mun aukast til muna. Jafnframt verður hljóðmengun mun minni en áður hefur verið.

Um er að ræða tvær nýjar þurrhreinsistöðvar og endurnýjun á blásurum og strompum. ÍSTAK vinnur verkið og hefur jafnframt séð um að afferma og flytja búnaðinn frá höfninni til Straumsvíkur.


« til baka