Alcan á Íslandi

04.10.2006

Safnaði milljón með 100 km hlaupi!

Margir starfsmenn Alcan í Straumsvík hafa gaman af því að hlaupa og sumir leggja mikið á sig til að ná settum markmiðum. Einn þeirra er Hilmar Guðmundsson, leiðtogi verkefnisstjórnunar á tæknisviði Alcan,  en hann tók á dögunum þátt í 100 kílómetra hlaupi sem haldið var í Árósum í Danmörku og safnaði í leiðinni einni milljón króna fyrir líknar- og vinafélagið Bergmál sem Alcan leggur fram.  Aðeins örfáir Íslendingar hafa tekið þátt í hlaupi eins og þessu, enda er það mikið afrek að leggja að baki 100 km.

Auk Hilmars tók annar Íslendingur þátt í hlaupinu, Guðmundur Magni Þorsteinsson, og komu þeir félagar saman í mark á tímanum 11 klst. og 58 mínútum (sjá mynd að neðan).

Hilmar segir að hlaupið hafi gengið vel framan af en vissulega hafi þeir verið þreyttir þegar hlaupið var yfir marklínuna. Gott hlaupaveður hafi hjálpað til fyrstu 50 kílómetrana en eftir það hafi sólin brotist fram úr skýjunum og gert hlaupurum lífið leitt. Hlaupaleiðin hafi hins vegar verið falleg og slíkt hjálpi vissulega þegar álagið er mikið.

100 kílómetra hlaup krefst mikils undirbúnings. Markvissar æfingar fyrir hlaupið hófust fyrir um hálfu ári, en síðustu tvö árin hafa verið notuð til að leggja grunninn að verkefninu. Á undirbúningstímanum hlupu þeir félagar, Hilmar og Guðmundur Magni, tvisvar frá Þingvöllum að Alþingishúsinu í Reykjavík (53 km leið) og á síðasta ári var hlaupin um 70 kílómetra leið umhverfis Þingvallavatn.

Með þessum merka áfanga náði Hilmar ekki einungis persónulegu markmiði heldur safnaði einni milljón króna fyrir samtökin Bergmál, sem hlúa að krabbameinssjúkum og öðru langveiku fólki. Samtökin hafa um áraraðir boðið fólki til orlofsdvalar að Sólheimum í Grímsnesi og rennur styrkurinn til byggingar nýs orlofshúss samtakanna. Hilmari og Bergmáli óskum við báðum til hamingju.