16.03.2012
Slæmt siðferði er rót vandans - verðum að taka okkur saman í andlitinu
Rannveig Rist var einn frummælenda á Iðnþingi sem haldið var í gær og fer útdráttur úr ræðu hennar hér á eftir. Glærur sem fylgdu ræðunni má skoða með því að smella á hlekk neðst.
Rannveig sagði að of mikið væri einblínt á efnahags- og fjármál á Íslandi, því rót vandans væri miklu fremur slæmt siðferði, eiginhagsmunasemi, óheiðarleiki og virðingarleysi. Sagði hún að Íslendingar þyrftu að taka sig saman í andlitinu hvað þetta varðar.
Þá sagði hún ekki búandi við það til lengdar hversu lítið traust helstu stofnanir samfélagsins hafa hjá almenningi.
Hún sagði frá 60 milljarða fjárfestingarverkefninu hjá álverinu í Straumsvík, sem fengið hefði fremur litla athygli, og sagði ástæðuna sennilega þá að ekki væri ágreiningur um verkefnið, en ágreiningi og deilum væri hampað of mikið í umræðunni.
Loks benti hún á að tillaga iðnaðar- og umhverfisráðherra um flokkun virkjanakosta fæli í sér verndun á yfir helmingi virkjanakosta. Aftur á móti væri þar boðað grænt ljós á undirbúning umtalsverðrar orkuöflunar, eða sem nemur um 13 terawattstundum. Sú orka myndi duga fjórum Straumsvíkurálverum og að auki til 20-földunar ylræktar. Þarna væru því forsendur fyrir mjög mikilli verðmætasköpun.
Sagðist Rannveig vona að nýtingarflokkur yrði ekki minnkaður um fjórðung, eins og nefnt hefði verið í fréttum, enda stæði þá aðeins eftir að leyft væri að byggja eina nýja vatnsaflsvirkjun á Íslandi, Hvalárvirkjun í Ófeigsfirði. Taldi hún ótrúlegt að það yrði sú sáttatillaga sem áralöng vinna við rammaáætlun átti að skila.
Loks sagðist Rannveig sannfærð um að iðnfyrirtæki landsins yrðu í fararbroddi nýrrar sóknar á Íslandi.
Glærur sem fylgdu erindi Rannveigar má skoða með því að smella hér.
Ljósmynd: Samtök iðnaðarins.
« til bakaDeila