16.03.2010

Álið frá Straumsvík fer um allan heim

Álver er öðruvísi vinnustaður en margir eiga að venjast. Á hverjum degi, allt árið um kring, er rafgreint ál úr súráli. Það er síðan flutt í steypuskála og steypt í barra sem síðan eru sendir úr landi á skipum sem koma vikulega til hafnar í Straumsvík. Margir hafa eflaust velt fyrir sér spurningunni: “Hvað verður síðan um álið?”

Því er til að svara að þegar málmurinn siglir úr höfninni í Straumsvík á hann langa ferð fyrir höndum uns hann kemst í hendur þeirra sem að nota afurðina á endanum.

Í dag fer framleiðsla fyrirtækisins fyrst til Rotterdam í Hollandi og þaðan til viðskiptavina sem að eiga völsunarverksmiðjur í Þýskalandi og Sviss. Fyrstan viðskiptavina skal telja Hydro Norf og Novelis Norf sem deila saman stærstu völsunarverksmiðju í heimi, nærri Dusseldorf í Þýskalandi. Afkastageta hennar er um 1,5 milljónir tonna á ári og er ISAL einn af mörgum birgjum þeirra. Barrarnir eru fluttir á prömmum frá Rotterdam upp Rínarfljót og leggja að landi við Sturzelberg rétt hjá Norf. Norf starfrækir einnig eigin steypuskála þar sem ál er brætt upp og steypt í barra til eigin nota.

Alcan á Íslandi hf. sendir Novelis Norf barra af ýmsum gerðum: 1-seríu sem er notuð í álpappír, 8-seríu sem notuð er í umbúðir ýmiss konar, 5-seríu með lágu magnesíuminnihaldi sem er notuð í klæðningar á hús, sem og 5-seríu með háu magnesíuminnihaldi sem er notuð í bílaiðnaðinn og áldósir. Fyrirtækið hefur hafið tilraunaframleiðslu á því melmi sem notað er í dósalokin (það er annað melmi en í sjálfar dósirnar) og ljóst er að ekki þýðir að kasta til höndunum ef úr á að verða góð afurð.

Til Hydro Norf fara einnig 1- og 8- seríur en að auki höfum við sent Hydro tilraunaframleiðslu í 6-seríu sem er einkum notuð í bílaiðnaðinn. Þess má geta að stærstur hluti 1-seríunnar til Hydro fer í prentplötur.

Stærstur hluti framleiðslu Alcan á Íslandi hf. eða rúmlega helmingur fer til Singen í Suður-Þýskalandi og eru barrarnir fluttir þangað með lestum frá Rotterdam. Þar starfa tvö systurfyrirtæki okkar, Alcan Singen og Alcan Packaging Singen með framleiðslugetu upp á samtals 240 þúsund tonn á ári. Þar af er um helmingur steyptur í steypuskála Singen. Alcan Singen sér um alla heitvölsun fyrir bæði fyrirtækin en kaldvölsunin fer fram hjá hvoru fyrirtæki um sig. Alcan Singen er sérhæft í klæðningum á hús, speglum, álpappír o.fl. Alcan Packaging Singen er hinsvegar sérhæft í framleiðslu á umbúðum fyrir lyfjaiðnaðinn. Í lyfjaiðnaðinum eru gerðar gríðarlegar kröfur um gæði framleiðslunnar og því er afar mikilvægt að vanda sérstaklega til framleiðslunnar.

Síðasti viðskiptavinurinn í þessari upptalningu er Novelis Sierre í Sviss. Sú verksmiðja hefur framleiðslugetu upp á 130 þúsund tonn. Þangað fer málmurinn á prömmum upp Rínarfljót til Basel og þaðan á lest til Valais í suðurhluta Sviss. Ferðin tekur um 2 vikur frá því skipið lætur úr höfn í Straumsvík. Sierre hefur löngum keypt af okkur tvö melmi í 6- og 8-seríum sem notuð eru annars vegar í Audi bifreiðar og hins vegar í Alupex rör. Nú hafa bæst í hópinn melmi úr 1-seríu og annað úr 8-seríu, sem notuð eru í álpappír og umbúðir.

Allir þessir viðskiptavinir okkar eiga það sameiginlegt að leggja mikla áherslu á gæði í framleiðslu og vilja fá hráefni sem uppfyllir allar gæðakröfur og á réttum tíma. Markmið okkar er að vera fyrsta val okkar viðskiptavina og að vörumerkið Alcan á Íslandi hf. verði þekkt sem ákveðinn gæðastimpill. Við höfum þegar notið þess að vörumerkið er þekkt því nýr viðskiptavinur, AMAG, sem staðsettur er í Austurríki mun bætast í flóruna á þessu ári og sá aðili gerði kröfu um að fá ál frá Alcan á Íslandi hf.

Til að þessi markmið geti orðið að veruleika þurfum við ávallt að hafa í huga að gera betur í dag en í gær. Sá sem ekki þróast áfram og bætir sig á litla möguleika að lifa af í harðnandi samkeppni á markaði sem spannar allan heiminn.


« til baka