17.05.2011

Tvö hundraðasti nemandinn útskrifast úr Stóriðjuskólanum - námið nú metið sem hálft stúdentspróf

Útskrift nemenda úr grunnnámi Stóriðjuskóla álversins í Straumsvík fór fram í gær, mánudaginn 16. maí, í sextánda sinn.

Að þessu sinni útskrifuðust ellefu nemendur og hafa þá alls 206 nemendur lokið grunnnámi og hlotið titilinn „stóriðjugreinir“ frá stofnun skólans árið 1998.

Upplýst var við athöfnina að menntamálaráðuneytið hefur samþykkt að meta grunn- og framhaldsnám skólans til allt að 78 eininga á framhaldsskólastigi, eða sem samsvarar rúmlega hálfu stúdentsprófi, sem er 140 einingar. Þar af er grunnnám Stóriðjuskólans nú metið til allt að 34 eininga og framhaldsnámið til allt að 44 eininga.

Fram til þessa hefur grunnnámið verið metið til 24 eininga. Forsendan fyrir endurmatinu er að komin er út námsskrá fyrir starfsfólk í stóriðju, sem ISAL vann í samstarfi við Fræðslumiðstöð atvinnulífsins.

Rannveig Rist, forstjóri Rio Tinto Alcan á Íslandi, sagði að þetta væri í senn dýrmæt viðurkenning fyrir skólann og mikilvæg lyftistöng fyrir þá starfsmenn sem hefðu hug á að sækja sér aukna menntun.

Rannveig gat þess einnig að það væru merkileg tímamót að fara yfir 200-nemenda markið. „Það er enginn vafi í okkar huga að Stóriðjuskólinn á ríkan þátt í þeim árangri náðst hefur á ótalmörgum sviðum rekstrarins hér í Straumsvík. Sumt af því má mæla, svo sem framleiðni og afköst, en annar ávinningur, sem er ósýnilegur í mælitækjum, er þó ekki síður dýrmætur. Þar á ég ekki síst við það, hvernig Stóriðjuskólinn hefur aukið samskipti og skilning á milli hinna fjölmörgu deilda fyrirtækisins og þannig stuðlað að samhentri liðsheild.”

Svandís Svavarsdóttir, umhverfisráðherra, flutti ávarp við athöfnina og sagði stofnun Stóriðjuskólans sýna metnað fyrirtækisins. Álverið í Straumsvík væri dæmi um vel rekið fyrirtæki og að þjálfun og þekking starfsmanna væri lykillinn að því að viðhalda þeim árangri sem hefur náðst.

Haraldur Helgason í skautsmiðju var 200. útskriftarnemandinn og hlaut blómvönd af því tilefni.

Aðrir sem útskrifuðust voru:

Atli Sigurðsson, kerskála
Bogi Hreinsson, kerskála
Eyjólfur Svanur Kristinsson, steypuskála
Guðmundur Rafn Jónsson, steypuskála
Haukur Már Hauksson, steypuskála, sem jafnframt flutti ávarp fyrir hönd útskriftarhópsins
Jóhann V. Tómasson, hliðvörslu
Jón Gestur Guðmundsson, rannsóknastofu
Sigðurður Þormar, skautsmiðju
Svandís Ólafsdóttir, kerskála
Ægir Hafsteinsson, kerskála

Viðurkenningar fyrir bestan námsárangur hlutu þau Atli, Ægir og Svandís. Viðurkenningar fyrir ástundun hlutu Sigurður og Ægir.

 


Útskriftarhópurinn við athöfnina í Straumsvík í gær.


« til baka